9月心郁郁想外遊？唔使去得遠嘅，近近地去澳門都可以有好多好嘢玩同好嘢食，又可以避開請大假要安排嘅苦惱，又滿足到外遊嘅願望！點解去澳門？因為9月將會有10支來自世界各地嘅參賽隊伍去到澳門參加一年一度嘅《澳門國際煙花比賽匯演》！最啱一家大細又或者情侶一齊去，喺一幕幕盛開嘅煙花配上震撼嘅音樂，一定會係一個難忘嘅晚上。
今年《第29屆澳門國際煙花比賽匯演》會喺9月1日、8日、15日、24日及10月1日嘅晚上9點及9點40喺澳門旅遊塔對出海面舉行，參賽隊伍分別嚟自菲律賓、韓國、日本、比利時、法國、葡萄牙、德國、奧地利、義大利及和中國，各國好手同聚競技，當然唔可以錯過！而今年煙花嘅主題就分別係「絢麗和諧頌」、「奇幻花火夢」、「天籟亮星空」、「璀璨中秋夜」同「銀花賀國慶」，大家到時要落足眼力睇吓邊隊最切合主題同印象難忘啦！
小編比個Tips大家，如果覺得澳門旅遊塔廣場太多人，怕可能太逼嘅，不彷去附近嘅西灣湖畔、南灣湖畔、主教山西望洋公園、觀音蓮花苑、澳門科學館、氹仔海洋花園大馬路岸邊或者係嘉樂比總督大橋湖邊，都係絕佳嘅觀賞地點
