環球美食之旅！波士頓龍蝦、加拿大鱈場蟹腳、即開生蠔、日本刺身、花雕醉鮑魚、香煎鵝肝、即切烤肉、臨瑯滿目嘅甜品如即製士多啤梨羅曼諾夫、士多啤梨乳酪慕絲⋯⋯係咪聽見都到流晒口水先？
香港港麗酒店自助餐廳咖啡園推出嶄新嘅「海陸美饌尋味之旅」自助晚餐，小編第一時間去同大家試菜，睇下佢有咩賣點同必食之選！
第一時間梗係先食回本海鮮！首先，酒店為每位客人奉上兩隻即開生蠔，味道鮮甜肉質滑嫩，極富海洋氣息。
花雕醉鮑魚同樣出色，非常入味！
再來刺身，拖羅高質，而油甘就好肥美！
龍蝦非常新鮮，內質彈牙又鮮甜！長腳蟹相對嚟講就爭啲，比較細隻及味道較淡，建議不如俾個胃留返啲空間食多幾隻龍蝦！
食完一輪前菜、冷盤，正式食主菜！首推燴牛肉！非常入味，而且好㝝，入口即化，比想像中還要好食！
威靈頓牛柳外層焗得金黃香脆，內裡香濃柔嫩！美中不足係個酥皮略為散開了。以香料醃製過嘅鹽焗原條三文魚反而好有驚喜！鹹香、好有海魚鮮味！好好食！
海南雞嫩滑可口，油飯好香！如果啲飯再熱返啲就更出色！至於叉燒，我哋試咗兩輪，第一輪略瘦，只係普通！食第二輪，剛好遇上出爐，兼且半肥瘦，好食好多！叉燒都係要肥至好食 (純綷個人口味！嘻嘻⋯⋯)
飲品方面，包括果汁、汽水及指定啤酒無限暢飲，亦可另加 $120 無限添飲指定紅酒、白酒及氣泡。
備受歡迎嘅戶外燒烤區重新開放，啱晒食肉獸！廚師會即席烤製各式肉類如斧頭豬扒、和牛肩扒、澳洲羊架、脆皮豬腩及雞槌等！我哋試咗和牛肩扒及燒雞，味道唔錯，有碳燒嘅煙燻香氣！係微涼嘅晚風吹拂下一邊享受燒烤美食，一邊欣賞城市美景，猶如度假般舒適寫意！
嚟到尾聲，當然少不了最令人期待嘅甜品環節！現場即製嘅士多啤梨羅曼諾夫真係好有驚喜！廚師用牛油、白砂糖起鑊，再加白酒及士多啤梨輕煮，最後添上淡忌廉，就完成一道漂亮又美味嘅甜品喇！呢個甜品好 light 好好食，加上不太甜，食多幾個都無問題！
鍾意食士多啤梨嘅話，仲有另一款每人限定一客嘅即製士多啤梨乳酪慕絲！呢款甜品賣相好靚，望落好似一個可愛日式小饅頭，士多啤梨清甜，慕絲又好綿滑，非常好食！掂呀！
此外，仲有即製嘅經典意大利芝士餅、法式焦糖燉蛋、士多啤梨千層蛋糕、黑森林蛋糕、綠茶撻、Haägen-Dazs 雪糕等，為豐盛的自助晚餐譜上完美句號。
另外，自助餐設有生日禮遇，凡於生日月份內經網上商店或致電預訂自助晚餐，餐廳將奉送迷你生日糕點乙件。需最少一日前預訂。
咖啡園自助晚餐詳情：
【價錢】星期日至四：成人 $798 / 小童 $398；星期五至六及公眾假期：成人 $838 / 小童 $438
【用餐時間】6:30PM-9:30PM
【預訂網址 – 1】https://eshop.conraddining.com (逢星期二，酒店官網設有48小時獨家優惠，自助晚餐有高達7折優惠)
