滿載香港人回憶嘅荔園，聽日下午6點就正式開幕啦！Big Fun Trip 搶先入「荔園Super Summer」試玩各大遊戲、景點。
會食蕉會Poo Poo
一入門口就有「吸蕉大笨象」歡迎你，掟蕉比佢食，佢個口佢會好開心咁叫同噴水！最後仲會Poo Poo 添！
男神碰碰車
遊樂場就梗係唔少得「盞鬼碰碰車」！男神王宗堯同我哋親身試玩！
「瀡」落去嘅恐龍屋
除左有「吸蕉大笨象」，仲有龐然巨物「滑稽恐龍屋」！昔日嘅恐龍屋係要行入個恐龍館入面，然後好多恐龍郁嚟郁去！呢個滑稽版就變成一個「瀡」滑梯！「瀡」落去幾有速度感，但就感覺太快玩完！
我左眼同右眼都見到…
鬼屋「魔靈小學」係另一焦點！昔日嘅「神秘竇洞」係要坐架車入去，然後架車會嘭澎聲咁撞落啲門，一路深入去鬼屋嘅不同部分，好似去左十八層地獄咁！宜家呢個「魔靈小學」就無得坐車，要自己行入去，而且high tech 左，玩AR Effect，事前要用手機download 定隻app，入到去見到有射燈照住嘅地方記住用個app 對準佢，咁你左眼同右眼就會見到啲嘢！會見到啲咩？咁要你自己諗下了。
「魔靈小學」同「神秘竇洞」邊個好玩啲？講真，小弟都係懷念以前間鬼屋多啲，如果你抱住想玩返以前間鬼屋嘅心態，可能會失望都未定。不過呢個始終都係臨時版本，所以都好難比較嘅！
咁間鬼屋驚唔驚先？咁就見人見智了，小弟就全程無驚過，但同行嘅另一女記者就嚇到喊左！
玩幾耐㗎？其實都幾快行完！哈哈…
最啱情侶同一家大細
以前嘅空中單軌車，宜家變成「新巴城巴開心列車」，可以圍繞荔園半圈！仲有「快樂叮叮船」同「淘氣小木馬」，都係最啱情侶或一家大細玩。
攤位遊戲唔少得
講起荔園一定諗起攤位遊戲，兩者嘅關係就係我等於你而你又等於我咁。除左「經典掟階磚」，今次仲加左好多其他新的攤位，不妨試下身手贏個獎品返屋企。
唔係唔影返夠本下話
場內當然有唔少影相位，最啱各位Selfie控，可以比你影到夠post 上FaceBook！
玩到呢度其實都好肚餓了！唔使驚！場內有「荔園冰室」、「香港大排檔」、「小忌廉餐廳」、「足球小將餐廳」… 多款懷舊食品等緊你！
「荔園Super Summer」詳情：
日期：2015年6月26日至9月初
地址：中環龍和道九號中環海濱活動空間
開放時間：早上11點至晚上11點 (6月26日下午6點開幕)
費用：免費入場，大部份遊戲須購買代幣 (代幣每個$10)
$680荔園兩人快證：
包括：兩條快證手帶、兩份紀念品同40個代幣總值$400
快證手帶可以由快證通道進入12處遊戲景點，包括：「魔靈小學」、「盞鬼碰碰車」、「百厭滑梯」、「新巴城巴(開心列車)」、「吹漲動物園」、「佻皮城堡」、「鬼馬飛天椅」、「夏日溜冰場」、「咖啡杯」、「滑稽恐龍屋」、「淘氣小木馬」、「快樂叮叮船」。
- 「魔靈小學」係全園最貴嘅遊戲，玩一次要8個代幣，$80；
- 「滑稽恐龍屋」同「快樂叮叮船」成人收4個代幣，6歲或以下小童則2個代弊；
- 「盞鬼碰碰車」13歲或以上人士6個代幣，8至12歲3個代幣；
- 「夏日溜冰場」5個代幣。
另外，園內有6個景點免費，包括「荔園城堡」、「電子哈哈鏡」等。
