香港人一年閒閒地都飛三、四次啦！不過成日搭飛機嘅你，又知唔知機艙内其實勁多菌！
農曆年正正係香港人外遊嘅高峰期，今年啱撞正武漢肺炎大爆發！幾百人困係密室一樣嘅機艙，你都咪話唔驚！加上機艙成日被指清潔做得唔夠，如果病毒留咗喺機艙入面，有可能大大增加感染機會！外國就有媒體喺18班航機內，抽取超過100個樣本，盤點咗五個機艙入面嘅污糟黑點！所以上機前同上機後都要做足抗疫措施，以防中招啊！
第5位：安全帶
估唔到呢？你可以唔去厠所，但係安全帶冇得唔用！你都唔知上一手邊個用過，而且航空公司又唔會成日清潔！外國有媒體曾經抽樣檢驗，發現三分一嘅安全帶上面佈滿霉菌！
第4位：餐枱
如果遇著機駁機，餐枱係根本唔會夠時間清潔，自然就成為污糟黑點！除咗有霉菌之外，餐枱亦發現有鏈球菌！
第3位：厠所門鎖把手
厠所多菌係人都知，重點係勁多人去完厠所唔洗手，沖厠時啲水花又濺到成個厠所內都有！門鎖把手就首當其衝沾滿污物！試幻想一下，當你洗完手，滿以為乾乾淨淨咁行返出嚟走去食飛機餐，誰知你關厠所門時，不經意掂到門把，手上就沾了厠所污物，然後又走去食嘢… OMG！
第2位：椅背的雜物袋
小編我點都估唔到！調查發現好多人乜嘢都攝喺嗰度：食物包裝紙、手機等呢啲大路嘢我明呀！但誇張到連用過嘅衛生巾 / 安全套 (吓?!)、有料尿片等都攝落去，就真係太噁心！總之乜鬼垃圾都攝落去！研究發現呢啲椅背雜物袋有大腸桿菌、霉菌等！Oh gosh… 根本係個垃圾筒嚟喎！
第1位：椅枕
個個都零距離咁瞓個頭落去，見得到嘅有頭油，見唔到嘅有大腸桿菌、霉菌、頭蝨等！污糟程度同屎坑有得揮！即係話全個機程你個頭就好似放咗入屎坑一樣… 諗諗下小編個頭都痕痕地！
最後送多個彩蛋比你，原來飛機上嘅毛毯係勁勁勁多霉、細菌等！可能你會問：我問空姐攞新嘅咪得！錯！呢個測試樣本係攞已經包咗膠袋嘅「新」毛毯，但係都係勁污糟！睇來飛機上嘅清潔衛生問題都有好多改善嘅地方！
資料來源：https://www.cbc.ca
污糟機？駛乜驚！
咁以後搭飛機點算好？唔駛驚！除咗帶住口罩，只要帶定消毒濕紙巾同清潔劑，
小編推介 (一)：Tempo 得寶．抗菌倍護濕手巾
殺滅99%常見細菌之餘，紙質仲好柔韌添！
小編推介 (二)：75%酒精
一包十張紙巾怕唔夠抺嘅話，可以考慮直情帶支消毒藥水上機。唔駛多講，酒精一定 work，帶支細細哋 (50ml) 上機都夠抹！
